Ang Mindanao Children's Library (MCL) adunay tulo ka kalihukan. Kini mao ang Pagbasa, Pamantalaan ug ang Proyekto sa pagpatambal. Ang unang tumong niining maong organisasyon mao ang pagbasa ug mga estoya sa mga bata sa panahon nga kami mobisita sa nagkalain-laing lugar sa Kidapawan ilabi na ang lugar sa Lumadnong kabataan. Ang MCL motabang niadtong mga bata nga nanginahanglan ug tabang pinaagi sa pagbisita namo sa nagkalai-laing lugar, ug kung adunay mga bata nga may deperensiya sa panglawas ug angay gayod nga tabangan, amo silang tabangan. Pero motabang lamang ang MCL kung mismo ang Staff niining maong organisasyon ang mobisita nianang lugara ug makit-an ang maong bata ug magkaestoya sa ginikanan aron sa pagsiguro nga kining bataa angay nga tabangan.
Sa panahon nga kami mobisita sa usa ka lugar ug makigkita sa mga Lumadnong kabataan ug sa panahon sa pagbisita kadtong bata nga adunay deperensiya, kinasing-kasing namo kanang tabangan. Dili usab kami magsuroy-suroy aron lamang sa pagpangita naiadtong mga bata aron patambalan kondili gikinahanglan pa ang pagbisita mismo sa mga tinugyanan niining maong organisasyon, tungod kay kini usa lamang ka gamay'ng organisasyon ug kung gusto namong motabang, motabang kami nga boluntaryo lamang.
Didto sa Pikit, kami mibisita ug sa panahon sa among pagbisita, naay mga bungi nga mga bata ang among nakita. Kadtong mga bataa mao ang anak sa atong mga igsoon nga Muslim nga biktima usab sa nahitabong kagubot sa Pikit. Kami usab nagpahigayon ug pagbasa sa Cabangbangan, Pres. Roxas, unya nakita namo ang usa ka Lumad nga bata nga adunay deperensiya sa mata. Ang MCL motabang sa maong bata kutob sa makaya lamang. Sa lugar sa Makilala usab adunay usa ka bata ang gitabangan nga maoperahan ang burot sa iyang ulo sukad niadtong siya gihimugso sa iyang inahan.
Ang proyekto sa pagpatambal nga gipahigayon niining maong organisasyon makatabang kaayo sa mga bata nga adunay kakulian sa ilang panglawas ilabi na gayod kadtong mga bata nga bungi. Kini dili dako nga organisasyon apan naggahin lamang kami ug medisina nga kutob ra sa makaya niining maong organisasyon tungod kay ang pokus gayod namo mao ang pagbasa ug mga estorya sa mga bata. Kini dili usa ka misyon sa pagpanambal kondili usa lamang ka gamay nga proyekto sa pagpatambal.
Ang MCL misuporta niining mga bataa tungod kay gusto nga makatabang sa mga Lumadnong kabataan. Ug ang pagbasa ug estorya sa nagkalain-laing lugar mao ang importante nga kalihukan niining maong organisasyon aron makatabang dili lamang sa materyal nga bahin kondili apil na niini ang mga balatian sa mga bata. Kining mga bataa nanginahanglan kaayo ug pagtagad tungod kay sila nakasinati ug kahadlok sa nahitabong kagubot sa maong lugar bisan pa man sa linghod nilang pangidaron.
Ang sentro niining maong kalihukan mao ang mga bata bisan asa kami paingon ilabi na kadtong mga Lumad nga mga kabataan.