PAGBASA UG MGA ESTORYA
by: Bebing
Niadtong Mayo 6,2003, nagpahigayon kami ug
pagbasa sa duha ka barangay sa President
Roxas, ang barangay Cabangbangan ug Idaoman.Among
una nga giadto ang barangay Cabangbangan.Layo
kining maong barangay gikan sa among opisina
sa Kidapawan City. Apan naabot namo kini
sulod sa beinte minutos, tungod sa kakusug
sa dagan sa among sakyanan bisan medyo dili
maayo ang kalsada pasulod sa maong barangay.
Ug tungod usab sa wala makasayo ug hatag
sa impormasyon kanamo. Nakaabot na sa ilang
lugar ug nakita namoang ilang nindot nga
lugar, bukid apan daghan ang mga tanom, adunay
lubi, mais ug uban pa. Aduna usab halapad
nga basakan sa ubos nga bahin niini ug adunay
sapa nga nagasuporta ug tubig sa ilang basakan.
Sa among pag-abot didto, mainiton ang ilang
pagdawat kanamo. Adunay daghang mga bata
nga mitambong sa maong pagbasa, kauban sa
ilang mga ginikanan ug sa ilang kapitan nga
wala gayud mibiya kanamo hangtud nga wala
kami mahuman. Nakita ko nga enteresado usab
ang ilang mga ginikanan nga ang ilang mga
anak makaapil niini. Akong nakita ang kalipay
sa ilang nawong tungod kay nalingaw usab
sila sa pagbasa ug pagtan-aw sa mga hulagway
sa mga libro. Kay bisan tuod ug naga eskuwela
ang uban kanila , apan wala pa sukad sila
makakita niining mga libroha, nga gituyo
paggahin sa MCL[Mindanao Childrens library].
Nalipay kami para kanila uban sa ilang mga
ginikanan kay namatikdan ko nga naminaw usab
sila kanamo tungod kay bisan tuod ug tigulang
na sila apan wala pa usab sila nakadungog
sa mga estoya sa maong libro.
Pagkahapon sa mao gihapong adlawa, among
gisunod sa pag-adto ang barangay Idaoman
ug nagpahigayon usab ug pagbasa didto sa
ilang kapilya. Nalipay kaayo kami nga gitubag
na sa mga tawo ang among programa kay nangayo
na sila ug matag bulan nga eskedyul kanamo.
Kini nagpamatuod lang nga maayo ang epekto
niining maong programa ug suwerte kaayo ang
mga bata nga nakapahimulos niining maong
programa kay kini nakatabang gayud kanila.
Ug kami nalipay kaayo nga nakatabang sa mga
bata nga sila usab malipay ug madani sila
sa pag-apil kon adunay panagtigom nga sama
niini.